MKDNews.com

На денешен ден пред дванаесет години загинаа 10-те прилепски резервисти на автопатот Скопје – Тетово, кај месноста Карпалак

Вчера во започнуваа чествувањата во спомен на борците, а нивните семејства, соборци, делегации од АРМ, од Локалната самоуправа положија свежо цвеќе пред спомен-обележјето во касарната „Мирче Ацев“, а ја посетија и спомен собата во кругот на касарната каде се сеќавањата за 10-те прилепски бранители.

Семејствата, соборците и делегациите го посетија и спомен-обележјето во селото Лениште кај Прилеп и манастирот „Света Петка“ во селото.

Денес, на годишнината, како што е најавено, делегации ќе ја посетат месноста Карпалак. Во црквата „Свето Благовештение“ во Прилеп ќе се одржи панихида во спомен на загинатите бранители.

Централното чествување за 10-те прилепски бранители ќе биде денес напладне, во центарот на градот, пред споменикот во нивна чест. Ќе биде откриен и споменикот „Прилепски бранители“ кој се извишува среде кружниот тек на булеварот „Гоце Делчев“ кај Основниот суд. Модерно стилизираниот паметник ја симболизира вечноста на спомените и делата на сите прилепски херои.

На 8 август 2001 година армиски конвој составен од пет возила и 120 резервисти наиде на заседа кај месноста Карпалак. Во одбрана на независноста, територијалниот интегритет и суверенитет на државата загинаа Нане Наумоски, Сашо Китаноски, Бранко Секулоски, Горан Миноски, Марко Деспотоски, Ердован Шабаноски, Љубе Грујоски, Дарко Вељаноски, Веби Рушидоски и Пеце Секулоски, сите од резервниот состав на АРМ од гарнизонот Прилеп.

Мермерната плоча кај Карпалак, како и другите плочи поставени во спомен на паднатите бранители во Тетовско се честа мета на вандали кои ги кршат или оштетуваат