MKDNews.com

Неколку стотини семејства од гостиварско за Рамазан ќе добијат пакети со храна. Станува збор за донација од 15 илјади американски долари од катарски бизнисмен кој планира да гради и социјални станови.

– Со парите, купени се прехрамени продукти и направени се триста и педесет пакети. Тие ќе им бидат поделени на сиромашни семејства за да достојно ги поминат рамазанските пости. Нашите служби, деновиве ќе почнат со дистрибуција, рече денеска на прес-конференција градоначалникот на Гостивар, Невзат Бејта.

Изразувајќи благодарност тој посочи дека таквиот чекор е пример кој треба да го следат и други.

Од контактите кои биле остварени со катарскиот донатор, произлегла идеја за помош на социјално загрозените семејства, особено на оние кои живеаат во лоши услови и импровизирани живеалишта.

– Тој изрази желба да се изградат објекти со станови, во кои домувањето ќе биде бесплатно. Идејата за нас е прифатлива и ќе работиме на обезбедување на локации. Но, повеќе детаљи ќе знаеме по средбата која очекуваме да се оствари наскоро, рече Бејта.

За кусо време ова е втора позначајна донација во Гостивар. Гостиварец кој има фирма во Италија, донираше 10 илјади евра за поставување украсна калдрма пред влезот на општинската зграда.