MKDNews.com

Илјадници лица се собраа на истанбулскиот плоштад Таксим откако се прошири информација дека властите ќе го ослободат полицаецот кој уби демонстрант.

Насобраниот народ бара правда и за сите оние кои беа повредени за време на протестите, кои низ цела Турција траат веќе цел месец. Демонстрантите, исто така, објавија дека паравоената полиција вчера убила еден курдски демонстрант.

Полицијата им даде два часа на демонстрантите да извикуваат слогани и да протестираат, а потоа ги предупреди дека повторно ќе употребат сила за да ги растераат. По предупредувањето, влетаа, го растурија протестот и уапсија неколку демонстранти.

Турската полиција остро реагираше на протестите ширум земјата, организирани против владата на Реџеп Таип Ердоган. Според последните информации, во последните три недели четири лица загинале при судирите со полицијата.